- As instalacións permaneceron pechadas desde o pasado mes de setembro tras o desprendemento dunhas pocións do forxado do teito
- O Goberno local asumiu o arranxo instalando unha rede de protección baixo a cuberta sobre as zonas de uso
Turismo de Galicia vén de ordenar a reapertura do Albergue de Peregrinos ‘Andrés Fernández García’ de Carril, tras as obras realizadas polo Concello de Vilagarcía de Arousa de reparación do desprendemento dunha parte do forxado do teito do establecemento producida o pasado mes de setembro. Este Goberno local comunicou a Turismo de Galicia o pasado venres 5 de decembro a finalización das obras no inmoble e que se podía retomar a actividade con seguridade.
As actuacións realizadas polo Concello consistiron na reparación do desprendemento dunha poción de forxado do teito do establecemento. Para elo, o Goberno local instalou unha rede de aceiro galvanizado sobre a área de cuberta sobre as zonas de uso.
O Albergue de Peregrinos ‘Andrés Fernández García’ permaneceu pechado desde setembro cando a Xunta acordou o peche cautelar para garantir a seguridade dos usuarios á espera de que o Concello realizase estas obras.
O inmoble fora cedido polo Concello de Vilagarcía de Arousa ao Goberno galego no mes de marzo e de cara á súa posta en funcionamento, foi preciso, por parte de Turismo de Galicia, dotalo de material e dar de alta os distintos subministros esenciais.
