— O Goberno galego reforzou nos últimos anos esta liña, o que fai que estas asociacións reciban hoxe case o tripo do importe que antes da pandemia
— Con cargo a estas axudas pode sufragarse o custo do menú, a vixilancia e coidado do alumnado, os gastos de mantemento, persoal e limpeza, así como os de enxoval
Un total de 147 asociacións de nais e pais de centros públicos recibirán as axudas da Xunta de Galicia para cofinanciar os servizos de comedor escolar xestionados por estas entidades, segundo recolle o Diario Oficial de Galicia.
O importe total adxudicado é de 1,6M€ e as axudas para cada unha das entidades oscilan entre os 622,66€ e os 271.597,12€ en función do número de comensais dos comedores do que se fan cargo, sendo as máis cuantiosas para as federacións de anpas, en concreto para as das cidades de Vigo e Pontevedra.
O Goberno galego reforzou nos últimos anos a partida achegada ás anpas por este concepto, o que fai que estas asociacións reciban hoxe case o tripo do importe que se destinaba a esta liña de axudas antes da pandemia.
O importe das axudas irá destinado a sufragar os gastos de xestión do servizo de comedor escolar que abranguen o custo diario do menú de mediodía por comensal, a vixilancia e coidado do alumnado durante o uso do servizo, os gastos de mantemento, persoal e limpeza, así como os de enxoval, materiais e utensilios para a prestación do servizo.
Apoio ás familias
Estas axudas enmárcanse dentro da liña de apoio ao servizo de comedor escolar, comedores que xestiona a Xunta de Galicia e os concellos, que tamén cofinancia a Consellería de Educación. Forma parte, ademais, das distintas medidas postas en marcha pola Xunta de Galicia para aforrarlle este curso ás familias máis de 100M.
