— Trátase dun dos grupos de XacobeAndo, un programa de voluntariado internacional do Goberno galego que, neste caso, promove a conservación e difusión do Camiño do Mar de Arousa e Río Ulla
— Todos os participantes na degustación gratuíta aportaron un quilo de alimentos destinados aos servizos sociais
A directora xeral de Xuventude, Participación e Voluntariado, Cristina Pichel, visitou este serán o Cooking Show Intercultural celebrado na localidade de Valga. Esta mostra de cociña, a cargo dos voluntarios de entre 18 e 30 anos do programa XacobeAndo da Xunta de Galicia, permitiu aos participantes gozar dunha degustación internacional e intercultural.
Os cinco mozos voluntarios neste grupo da iniciativa, procedentes de Grecia, Lituania, Letonia, Estonia e Andalucía, desenvolven ao longo do verán tarefas de conservación e difusión do Camiño de Santiago do Mar de Arousa e Río Ulla. Ao mesmo tempo, promoven actividades complementarias como esta presentación gastronómica de balde, que achega a Galicia receitas procedentes de cada un dos seus respectivos lugares de orixe. Ademais, a iniciativa contribúe cos servizos sociais, xa que cada un dos asistentes aportou un quilo de alimentos non perecedoiros.
Durante a actividade, a directora xeral destacou o seu grande carácter enriquecedor para a nosa comunidade, ao tempo que subliñou e agradeceu o traballo destes mozos no coidado e promoción do Camiño. Neste sentido, puxo en valor o voluntariado como ferramenta para realizar actividades cun importante impacto na contorna que, ademais, permite aos voluntarios viaxar, desfrutar e socializar.
Variedade de actuacións
Estas actividades con impacto, desenvolvidas polos voluntarios de XacobeAndo que se distribúen por toda Galicia, enmárcanse en tres eixos principais: camiño inclusivo, camiño sostible e camiño dixital.
Así, os mozos e mozas acompañan a grupos de persoas con discapacidade, colaboran no acondicionamento das distintas rutas ou promocionan a experiencia da peregrinación nas redes sociais. Ademais, difunden entre os camiñantes as medidas anti-COVID e colaboran cos hospitaleiros na súa acollida, entre outras actividades. O programa estenderase ata outubro con distintos grupos de voluntarios.