No acto divulgativo no centro educativo estiveron presentes o alcalde, Ricardo Martínez, e a concelleira Ana Peña e salientaron a importancia de implicar á mocidade no proceso de separación e reciclaxe de residuos domésticos
O alcalde de Portas, Ricardo Martínez, e a concelleira Ana Peña asistiron ao colexio para participar nunha iniciativa divulgativa sobre a entrada en funcionamento do novo sistema de Punto Limpo Móbil que percorre os distintos lugares do municipio así como os dos concellos de Campo Lameiro e Moraña.
Durante o encontro co alumnado, presentouse este novo servizo que permitirá facilitar un novo modelo de reciclaxe para diferentes residuos que se pon ao carón da veciñanza para xerar maior impacto e facilitar a correcta xestión dos residuos domésticos.
O funcionamento do servizo está baseado nun camión e unha plataforma que se deixa no lugar desexado, a cal está dividida nas diferentes fraccións nas que se pode separar con eficiencia para reciclar, como por exemplo os pequenos electrodomésticos, pilas, papel, vidro, entre outros residuos.
SENSIBILIZAR ÁS NOVAS XERACIÓNS SOBRE A RECICLAXE
Con esta iniciativa pretende sensibilizar á mocidade, en particular, e á veciñanza, en xeral, na necesidade de reciclar para protexer o medio ambiente e loitar contra o cambio climático.
Segundo o alcalde, Ricardo Martínez, “con esta iniciativa pretendemos achegar aos cativos esta nova propota para fomentrar a conciencia cidadá na importancia da separación e da reciclaxe. Queremos animar a todos os veciños e veciñas a separar correctamente os residuos e usar este novo servizo para facilitar esta acción de futuro e baseada nunha maior concienciación cívica sobre a importancia de reciclar e de defender o medio ambiente”.
