Máis de 300 persoas participaron na primeira andaina presencial Os camiños da memoria promovida polo centro de día da Pobra do Caramiñal coa colaboración do Concello. O desfile estivo integrado por persoas usuarias, familiares das mesmas e profesionais dos centros de día da Pobra, Porto do Son e Rois, ademais de alumnado e profesorado do CEP Salustiano Rey Eiras. Tamén contou con representación da Administración local, nesta ocasión, a concelleira dos Servizos Sociais, Amparo Cerecedo (BNG).
Esta acción xurdiu durante a pandemia de maneira online con motivo do Día Mundial do Alzheimer, que se conmemora no 21 de setembro, para “dar visibilidade a unha doenza que padecen os nosos maiores”, segundo explica a directora, Fátima Sendón, e traballando esta cuestión dunha maneira máis activa coa rapazada.
O itinerario partiu das inmediacións da instalación pobrense para dirixirse pola rúa Venecia, paseo dos Areos e vías do centro da vila ata chegar aos Xardíns de Valle-Inclán, onde tivo lugar un acto. Juan Pérez, usuario do centro pobrense, efectuou a lectura dun texto relativo á perda de memoria e á vellez, ao igual que fixeron algúns/algunhas dos/as estudantes do referido centro educativo. A cativada tamén quixo agasallar aos maiores cunha serie de debuxos e intercambiaron experiencias.
