• O candidato dixo que “xa perdemos moitas oportunidades, unha tras outra, cun goberno totalmente esgotado e cun alcalde ausente”, por iso é momento de apostar por “proxectos ambiciosos que nos coloquen na vangarda das vilas máis avanzadas”.
O presidente do Partido Popular de Pontevedra, Luis López, desprazouse esta mañá a Caldas de Reis para percorrer xunto ao candidato do PP á alcaldía, Fernando Pérez, e varios as rúas do concello, a Praza de Abastos e o mercado dos luns, e poñer en valor o gran proxecto dos populares para garantir o cambio neste concello. “Temos un proxecto serio, que representa á inmensa maioría social do concello, un gran equipo e ofrecémoslle aos veciños traballo duro e un goberno serio e unido dende o primeiro día. Sodes maioría en Caldas de Reis os que queredes un cambio, e Fernando Pérez é quen pode conseguilo”, subliñou López.
Por iso, di que “o PP con Fernando á cabeza aposta por un proxecto rigoroso e de unidade, que funcione desde o primeiro día sen ter que pactar postos e soldos e que se dedique exclusivamente aos veciños”.
Por último, recordou que o alcalde é o candidato do PSOE de Pedro Sánchez, “polo que a primeira oportunidade para cambiar o Goberno de España será o 28 de maio”. Ademais, dixo que é importante que os socialistas de Caldas de Reis tamén expliquen o que está facendo o seu Goberno en España, non só atacando de forma sistemática os intereses de Galicia, senón lastrando, unha vez máis, a economía dos fogares galegos.
Pola súa banda, Fernando Pérez subliñou que “é o momento do cambio tranquilo en Caldas de Reis, de abordar proxectos ambiciosos que nos coloquen na vangarda das vilas máis avanzadas”. Neste senso, lamentou que “xa perdemos moitas oportunidades, unha tras outra, cun goberno totalmente esgotado e dividido e cun alcalde ausente, e debemos recuperar o tempo que durante anos outros concellos aproveitaron e o goberno do noso concello non. Está na nosa man evitar que un pacto PSOE-BNG lastre, outra vez, o futuro das nosas fillas e dos nosos fillos”.
