A deputada provincial Isabel Couselo asistiu á nova acción do programa da Deputación “Mulleres en Acción. Violencia Zero”, protagonizada polas contadoras Vero Rilo e Carmen Conde, que se desenvolveu no CPI Julia Becerra Malvar en Ribadumia. Nesta peza, as artistas exploraron os camiños da narración oral desde unha perspectiva feminista ante o alumnado de 3ª e 4º da ESO.
Na súa intervención amosou o compromiso da institución provincial coa igualdade “que ten que ser unha realidade e é un obxectivo prioritario”. “Imos encamiñar os nosos esforzos –sinalou- para que esta provincia vaia a máis en canto á igualdade, que sexa un exemplo e unha referencia. E daremos pasos cara adiante, esforzándonos para conseguir esa igualdade efectiva de maneira real, porque sabemos que é fundamental para construír máis provincia”. Neste aspecto, a deputada convidou ao alumnado a sumarse “como axentes implicados” neste obxectivo.
