Para o BNG, a Xunta debe contribuír á creación dun EcoParque no espazo de A Coca e A Laxe que poña en valor o seu patrimonio etnográfico, similar ao modelo Allariz.
Montse Prado, candidata do BNG nestas eleccións, denuncia que “os nosos ríos están a soportar agresións de todo tipo: reactivación de proxectos mineiros contaminantes, verteduras, transformacións duras que desnaturalizan as marxes e deterioro paulatino do patrimonio asociado aos mesmos”. Augas de Galicia non só se mostra inoperante para evitar estes problemas, senón que mesmo aplica a táctica de barrer baixo a alfombra: retira o apoio ao Proxecto Ríos, un programa de éxito do voluntariado ambiental. No caso do Río do Con, confirmase o antedito. Malia contar na súa cabeceira coa Estación de Hidrobioloxía que fornece do rigor científico para aconsellar actuacións, a realidade mostra un desleixo que é patente no derrube de muros de contención sen restaurar ou na insuficiencia dos tanques de tormentas en construción que resultaran incapaces para frear o risco de inundación nas rúas céntricas, unha situación de emerxencia perante a evolución acelerada dos patróns climáticos sen abordar de raíz a desembocadura a ceo aberto da canle do río.
Montse Prado, manifesta tamén o compromiso do BNG para facer que o futuro goberno da Xunta contribúa a creación dun EcoParque, en sintonía coa demanda veciñal, que sume intervencións no actual Parque de A Coca, a rehabilitación dos Muíños de A Laxe, conformando un conxunto de valor patrimonial, lecer e divulgación medioambiental coa extensión dunha senda peonil á beira do río, unindo este espazo ate o cruce coa N-640.
Lembremos o modelo de Allariz, mostra do éxito coa intervención e posta en valor do seu río, nun espazo similar, apostando pola sustentabilidade, e polo coidado do medio natural herdado, facendo pedagoxía coa tradición, para goce da súa veciñanza.
