Máis de 440 crianzas participaron nesta xornada na Carreira Infantil da Ostra celebrada no Peirao de Arcade. Unha cita que, por primeira vez, contou cunha carreira inclusiva, adaptada e que tamén visibilizou a súa parte máis solidaria coa presenza da Asociación Bicos de Papel.
Éxito de participación nesta ca Carreira Infantil da Ostra, que tralo cambio de data, debido ao mal tampo na súa data orixinal o 31 de marzo, se celebrou nesta xornada dominical con éxito de asistencia e coa participación de máis de 440 crianzas. Trátase dunha carreira pedestre que se realizou por categorías de idade, con percorridos adaptados e trazado na área recreativa do Peirao de Arcade.
O obxectivo principal desta cita é a celebración da Festa do pobo a través dunha proba deportiva valorando sobre todo a compoñente social e participativa, representada con premios a todas e todos os participantes.
Ademais este ano tamén se cambiou o percorrido deste evento deportivo que se centrou máis no entorno do paseo do peirao de Arcade.
Trátase, como xa dixemos, dunha carreira que ten como obxectivo a participación, non é competitiva, independentemente do nivel de rendemento acadado. Todo os participantes recibiron o mesmo agasallo como recoñecemento o seu esforzo. Todas e todos recibiron unha medalla e unha mochila coa súa merenda e con material didáctico e información relativa á promoción de hábitos saudables.
Ademais, é a primeira edición na que se realiza unha carreira inclusiva, que responde á oportunidade de participación conxunta de persoas con e sen discapacidade, adaptándose ás posibilidades de cada quen. O percorrido realizouse co acompañamento de persoas familiares ou amigas e con persoas voluntarias. Tamén é a primeira vez que se fai unha carreira adaptada porque adecuouse a proba ás necesidades de cada persoa. Deste xeito, a persoa participante con diversidade funcional con necesidades especiais, puido realizar un percorrido exclusivo de aproximadamente 150 metros. Unhas medidas incluídas dentro do programa “Soutomaior Inclusivo”.
Os primeiros en arrancar esta carreira da Ostra foi a Carreira Inclusiva cun percorrido de 150 metros, a continuación foron as máis pequenas e pequenos da casa os Biberón B que correron acompañadas e a acompañados unha distancia de 50 metros, seguidos dos Biberóns A pequenas e pequenos que correron xa sós una distancia de 150 metros, Premenxamíns 300 metros, Benxamíns 400 metros, Alevíns 500 metros e a categoría de Infantís, os últimos en saír, percorreron 600 metros.
Nesta edición tamén falamos dunha carreira solidaria, xa que se proporcionou a visibilidade e posibilidade de colaborar coa Asociación BICOS DE PAPEL (que desenvolve o seu traballo coas familias cuxos fillos foron ou están a ser tratados na Unidade de Oncoloxía Pediátrica do Hospital Álvaro Cunqueiro de Vigo) a través da colocación dun stand durante o desenvolvemento da carreira co obxectivo de recadar fondos coa participación voluntaria dos participantes e as súas familias.
Unha carreira organziada polo concello de Soutomaior e na que colaboraron Abanca, Caixabank, Miler Vintage Running Club Pontevedra, a Rede Galega de Promoción da Saúde.Consellería de Sanidade da Xunta de Galicia e a Deputación de Pontevedra.
