• A proba organizada polo club Master Louriña consta de tres etapas que pasarán por Mos, Ponteareas e O Porriño os días 4 e 5 de maio
• Hoxe presentouse tamén o 42 Trofeo Horacio Barros en homenaxe ao fundador do club ciclista SPOL
A oitava edición da “Challenge Rías Baixas” ´ fin de semana reunirá esta fin de semana a 200 ciclistas para disputar as súas tres etapas.
A proba, organizada polo club ciclista “Master da Louriña”, presentouse esta mañá na no Concello do Porriño, nun acto no que participaron o alcalde do Porriño, Alejandro Lorenzo, a vicepresidenta da Deputación e responsable da área de deportes, Luisa Sánchez, a alcaldesa de Mos, Nidia Arévalo, o concelleiro de Ponteareas, Luis Rodríguez , o alcalde de Nigrán, Juan González, o presidente do club organizador, Juan José Álvarez, representantes da Federación Galega de Ciclismo e patrocinadores da proba.
Juan José Álvarez, presidente do club apuntou que un ano máis a carreira “asegura o espectáculo deportivo” e adiantou algunas das novidades desta edición, como a incorporación do Concello de Nigrán como patrocinador da sección feminina da proba ou a inclusión da etapa de Mos na Copa de Galicia. Álvarez lembrou que “se trata dunha proba na que os máster poden correr nunha carreira oficial, e este é un dos seus grandes atractivos”.
Pola súa banda, Rafael Pérez, do patrocinador LASAL, quixo salientar “o innegable traballo que desenvolve a organización a paixón coa que o fan”, motivo polo cal “sempre será un orgullo colaborar con eles no noso pobo”.
O Director Técnico da Federación Galega de Ciclismo, Jacobo Ucha, eloxiou o “complicado traballo loxístico que supón unha proba desta magnitude, que involucra a catro concellos e que o Master Louriña leva a cabo con solvencia. De aí que a Challenge Rías Baixas sexa xa unha proba de referencia no ciclismo master galego”.
Juan González, alcalde de Nigrán mostrouse entusiasmado de “incorporarnos a este grupo e máis aínda de facelo apoiando ao deporte feminino” e sumouse ás felicitacións á organización.
No mesmo sentido se manifestou o edil, Luis Rodríguez, destacando que Ponteareas “sempre estará apoiando o deporte, e como non, o ciclismo e quen fai posible este tipo de eventos. Por iso é un pracer para nós participar nesta nova edición da Challenge”.
Pola súa banda a alcaldesa de Mos, Nidia Arévalo, adiantou que no Pazo de Mos, onde dará saída a proba, “será un día de festa no que imos dalo todo e a facer da Louriña un referente do ciclismo” e incidiu no agradecemento aos organizadores, “un orgullo o traballo que facedes ano tras ano”.
A responsable provincial de deportes, Luisa Sánchez lembrou que “falar do Porriño, Ponteareas e Mos é falar de ciclismo” e por iso “ninguén mellor ca eles para facer unha proba que está no top do ciclismo master, algo que axuda a revitalizar a provincia e situarnos tamén no foco turístimo”.
Pechou o acto o alcalde anfitrión, Alejandro Lorenzo, animando a todo o mundo a “vir a disfrutar dos dous días da proba e achegarse este domingo ao Porriño a vivir a etapa raíña da Challenge, unha excelente oportunidade para coñecer ademais a nosa riqueza paisaxística e cultural”. Lorenzo reiterou o agradecemento a un club “que pon o corazón en cada evento que organizan, e iso é garantía de éxito”.
O acto rematou cunha sentida homenaxe a Horacio Barros, fundador do club ciclista SPOL , cuna do ciclismo porriñés. Na súa honra, o vindeiro mércores 1 de maio , disputarase en Torneiros o 42º trofeo Horacio Barros. Unha competición que se retoma co nome deste ciclista insigne que reunirá no parque do Piñeiro a 300 ciclistas base, das categorías promesas, principiantes, alevíns, infantís cadetes e junior.
“Falar do Porriño é falar de ciclismo, e falar de ciclismo no Porriño é falar de Horacio Barros”, concluíu o alcalde, “Grazas por tantos anos de ciclismo e por facer realidade os soños de moitos nenos e nenas do Porriño”.
