Desde hoxe luns e ata o mércores día 15, todos os veciños e veciñas de Redondela que o desexen poden votar na Campaña pola Igualdade no deporte “E ti por que loitas?” . Trátase dunha acción colaborativa entre os diversos clubs deportivos do Concello de Redondela e organizada polas concellerías de Igualdade e Deportes. Foron os propios clubs os que propuxeron lemas para esta campaña co fin dar visibilidade á opinión da nosa mocidade sobre as desigualdades presentes no deporte. As propostas poden consultarse na web do Concello de Redondela ou a través da app da Tarxeta Cidadá e son: “Por min, por ti, por nós… Labrando futuro”; “Como muller, nin un PASE atrás”; “Tod@s coa mesma pegada, o éxito é loitar pola igualdade”; “Na loita polo noso deporte só poñemos paixón, nin zapatillas, nin tacón”; “Porque na pista, a diversidade é a nosa forza, rompemos estereotipos para rodar cara á igualdade. E ti, súmaste?”
Para votar é preciso ter dado de alta a Tarxeta Cidadá do Concello de Redondela e estar empadroado na localidade. Os concelleiros Iria Vilaboa e Iván Valles animan á veciñanza a participar nesta votación “xa que o obxectivo é que toda a sociedade se implique”. Os dous lemas máis votados serán instalados nos pavillóns municipais de Redondela e A Marisma “para conmemorar esta campaña e lembrar, día a día, a importancia continuar coa loita pola igualdade”. Os dous lemas gañadores serán publicados o 17 de maio na web e redes do Concello.
