— Dotada con 8.500 euros para os 10 proxectos seleccionados relacionados co sector audiovisual, a iniciativa está impulsada pola Agrupación Europea de Cooperación Territorial da Eurorrexión Galicia-Norte de Portugal, a CCDR-Norte e a Consellería de Cultura, Lingua e Xuventude
— O prazo de presentación das candidaturas permanecerá aberto ata o 4 de outubro
— As residencias celebraranse na Coruña do 22 ao 26 de outubro
A Xunta, a través da Agrupación Europea de Cooperación Territorial (AECT) da Eurorrexión Galicia-Norte de Portugal vén de abrir o prazo ata o 4 de outubro da convocatoria para as Residencias Artísticas Nortear, que nesta primeira edición terá como tema central de traballo o sector audiovisual.
Os proxectos terán que ser individuais, presentados por persoas xurídicas residentes ou nacidos na Eurorrexión segundo os requisitos publicados nas bases. A convocatoria conta cun orzamento total de 8.500 euros, dos que cada un das 10 iniciativas beneficiarias recibirá 850 euros para axudas para gastos de traslado, aloxamento e mantemento.
As Residencias Artísticas terán unha duración dunha semana, entre os días 22 e 26 de outubro, na Sala de Exposicións Palexco, coincidindo con Intersección – Festival Internacional de Cine da Coruña, durante o que dez artistas compartirán espazo de traballo.
O obxectivo desta acción é seleccionar a 5 creadores de Galicia e outros 5 da rexión Norte de Portugal para desenvolver unha residencia creativa na cal desenvolvan proxectos artísticos audiovisuais e de novas tecnoloxías. Esta acción destínase a apoiar e acompañar dez creadores emerxentes, en base a un intercambio de experiencias.
Os participantes seleccionados contarán cun acompañamento artístico que consistirá en charlas e debates con outros creadores ou persoas relevantes do sector cultural.
As Residencias Artísticas Nortear son unha actividade conxunta da AECT da Eurorrexión Galicia – Norte de Portugal, da CCDR-Norte, e da Consellería de Cultura, Lingua e Xuventude, no ámbito do Proxecto Nortear, iniciativa de intercambio cultural cofinanciada pola Unión Europea a través do programa INTERREG España-Portugal.
