A Xunta de Goberno Local do Concello de Ourense aprobou 21 acordos na súa sesión ordinaria desta semana, que se desenvolveu este mediodía no salón de plenos. Por unha banda, acordou conceder licenzas a 3 proxectos, para a adaptación de baixo-cuberta para vivenda-estudio na rúa Dous de Maio, para reformar a cuberta dun edificio na rúa das Carrixeiras e para adaptar un local na entreplanta dun edificio da rúa Valle Inclán.
Tamén acordou desestimar 4 reclamacións de responsabilidade patrimonial por non concorrer os requisitos legais que dan dereito a unha indemnización e considerar unha particular desistida da súa reclamación.
Na mesma sesión, a xunta local aprobou a modificación non substancial do contrato de execución das obras de mellora da seguridade peonil mediante pasos de cebra con sinalización luminosa automática por detección de peóns, consistente na modificación das obras conforme á modificación do proxecto técnico de execución aprobada por Decreto da Concellería – Delegada de Obras Públicas e Urbanismo.
Finalmente, a Xunta Local deu conta de 5 sentenzas (3 do Xulgado do Contencioso-Administrativo número 1 e 2 do número 2), de 2 autos do Contencioso número 2 e dunha dilixencia do Tribunal Superior de Xustiza de Galicia. Tamén tomou coñecemento de que o Concello comparecerá en 4 procedementos diante de diferentes xulgados.
