A vicepresidenta da Deputación de Pontevedra, Luisa Sánchez, asistiu hoxe á sétima edición do Certame de Rondallas da Área Metropolitana de Vigo, un espectáculo que reuniu a 14 agrupacións de Vigo, Mos, O Porriño, Gondomar e Tui no IFEVI e co que colabora cunha achega de 10.000 euros. A vicepresidenta provincial felicitou á Federación de Rondallas da Área Metropolitana de Vigo “por continuar, ano tras ano, desenvolvendo este espectáculo único en Galicia” e ás agrupacións, pois “demostrades que a cultura tradicional está moi viva”. Tamén remarcou o compromiso da Deputación coa cita “para que sigades dando tantas alegrías a Vigo durante moitos máis anos” e coas rondallas, “ás que este ano destinamos máis recursos para seguir protexendo e promovendo este legado musical e cultural do que nos sentimos tan orgullosos”.
O Certame de Rondallas foi, ademais, este ano, dobremente especial, xa que o director Daniel Sánchez Arévalo aproveitou o certame para filmar varias escenas da súa película “Rondallas”. “Esta película supón un importante recoñecemento para o labor das rondallas e contribuirá, ademais, a difundir a música e a cultura a un público aínda máis amplo”, subliñou Luisa Sánchez.
