O deputado de Representación Institucional, Rosendo Fernández, recibiu no Pazo Provincial a preto de medio cento de rapaces e rapazas, aos que explicou o funcionamento e competencias da institución
O deputado de Representación Institucional da Deputación de Ourense, Rosendo Fernández, recibiu hoxe no Pazo Provincial a preto de medio cento de nenos e nenas que están a participar no campamento urbano de Amencer, que nesta xornada celebrou o seu “Día do Parlamento” cun pleno infantil no que se someteron a debate unha serie de propostas para a realización de novas actividades na próxima edición do campamento.
Rosendo Fernández, que respondeu as preguntas formuladas polos rapaces e rapazas, explicou o funcionamento e competencias da institución provincial, sinalando que “cando un veciño ten un problema acode ao seu alcalde, e cando un alcalde ten unha necesidade acode á Deputación, que é o concello dos concellos, cooperando na prestación de múltiples servizos”, entre os que citou como exemplos a recollida de lixo ou a xestión do ciclo da auga.
Ao remate da actividade, os participantes no pleno infantil (46 rapaces e rapazas, acompañados de 8 animadores e animadoras) recibiron agasallos institucionais da propia Deputación, do mesmo xeito que Rosendo Fernández recolleu en nome da institución provincial un diploma conmemorativo da Asociación Xuvenial Amencer, organizadora do Campamento Urbano.
