-O CSHG reforza o seu posicionamento como centro de referencia internacional cunha rede de 3.500 profesionais que traballan en 80 países
– O padrino da promoción será o copresidente executivo do Grupo Barceló, Simón Pedro Barceló Vadell
O director de Turismo de Galicia, Xosé Merelles, participará no acto de gradación da primeira promoción do Grao en Xestión de Empresas Hostaleiras, título oficial da Universidade de Santiago de Compostela impartido no Centro Superior de Hostalería de Galicia (CSHG) como centro adscrito.
A celebración terá lugar o vindeiro 30 de maio, ás 12,00 horas, no Salón de Convencións do edificio CINC da Cidade da Cultura. Ademais, contará coa participación do copresidente executivo do Grupo Barceló, Simón Pedro Barceló Vadell, como padriño da promoción.
Máis de 3.500 profesionais formados
O centro conta actualmente con 290 alumnos matriculados e todos eles realizarán prácticas este verán. Xa suma así máis de 3.500 profesionais formados que desenvolven a súa carreira en 80 países en compañías de referencia internacional.
Co obxectivo de seguir favorecendo o acceso aos estudos do seu alumnado, o CSHG reforzou este ano a súa política de bolsas e apoio aos estudantes. Así, convocáronse 10 bolsas para galegos residentes no exterior, incrementáronse as axudas de excelencia ata oito e melloráronse as contías das bolsas ordinarias, que cobren o 80% da matrícula. Ademais, o centro reduciu o importe da matrícula ata os 3.500 euros.
Paralelamente, o CSHG organizará xornadas de portas abertas durante os sábados do mes de xuño, dirixidas a interesados en coñecer a oferta formativa e as instalacións do centro.
