A Policía Local de Ourense detén 4 persoas por un presunto roubo con forza nunhas instalacións industriais de Outariz
A rápida intervención e o seguimento das patrullas municipais, coa colaboración da Policía Nacional, permitiu localizar tamén 2 sospeitosos que fuxiran por unha zona de monte
Ourense, 19 de outubro de 2026
A Policía Local de Ourense detivo catro persoas pola súa presunta implicación nun roubo con forza nunhas instalacións industriais da zona de Outariz, nunha actuación desenvolvida durante a noite do 16 ao 17 de outubro que contou coa colaboración da Policía Nacional.
O operativo iniciouse tras recibirse unha chamada no 092 que alertaba da presenza de varias persoas encapuchadas, algunhas das cales accedera ao recinto saltando o peche perimetral.
As primeiras patrullas da Policía Local acudiron con rapidez e, tras detectar movementos no interior, solicitaron reforzos. A intervención permitiu deter unha persoa dentro das instalacións e localizar outra nunha furgoneta estacionada nas proximidades. Outros dous sospeitosos fuxiron cara a unha zona de monte de difícil acceso. Os axentes estableceron un dispositivo de busca e vixilancia da contorna, coa participación da Policía Nacional.
A continuidade do traballo policial resultou decisiva. Horas despois, unha patrulla da Policía Local localizou na avenida de Santiago dúas persoas cuxas características e vestimenta coincidían coas observadas durante a intervención. Tras as comprobacións realizadas e a localización de indicios que as vinculaban cos feitos, ambas as dúas foron detidas.
Na inspección do recinto comprobouse que unha máquina expendedora fora forzada e que outras dependencias e un vehículo presentaban signos de rexistro. Durante o operativo interviñéronse ferramentas, diversos efectos e unha furgoneta, que foi trasladada ao depósito municipal a disposición da autoridade xudicial. As catro persoas detidas foron trasladadas a dependencias da Policía Nacional para a continuación das dilixencias.
Fontes do Concello poñen en valor a profesionalidade, a capacidade de resposta e a perseveranza da Policía Local nesta actuación, e recoñecen a colaboración prestada pola Policía Nacional. Así mesmo, destacan a importancia da colaboración cidadá e dos avisos ao 092 para facilitar unha intervención rápida ante posibles feitos delictivos.
