A alcaldesa de Santiago, Goretti Sanmartín, presidiu a presentación de Belén Hernández como nova directora xerente de Mercagalicia, nun acto no que participou tamén o presidente de Mercasa, José Miñones. A rexedora destacou a valía de Belén Hernández nesta nova responsabilidade para afrontar os retos de futuro máis inmediatos e a longo prazo: optimizar as instalacións, incluír novos produtos e a a diversificación económica do concello. Pola súa parte, Miñones corroborou as cualidades de Belén Hernández para esta nova xeira na que comprometeu o seu apoio para converter Santiago nun referente loxístico, mentres que a nova directora xerente expresou a “ilusión” coa que afronta este reto e sentiuse “moi honrada” por afrontar esta nova xeira co apoio dos socios da merca.
Na súa intervención en rolda de prensa na sede de Mercagalicia, Goretti Sanmartín destacou a colaboración entre as distintas entidades e tamén defendeu que para Santiago, esta nova etapa da merca supón “unha oportunidade para establecer sinerxias” con todos os sectores do concello, como o comercio, a hostelería local e a praza de Abastos. Mercagalicia ten como socia maioritaria ao Concello (51%) e a Mercasa (49%).
“Santiago de Compostela ten o obxectivo da diversificación económica e mellorar a industrialización”, esgrimiu, asemade, Goretti Sanmartín, quen agradeceu tamén a implicación do presidente de Mercasa neste obxectivo para converter Santiago en referente loxístico, para “dar ese salto de enorme trascendencia para o Concello”. Así, fixou como parte dese obxectivo a plataforma loxística, coas obras xa iniciadas, completar o trazado do Orbital ou a reivindicación histórica da estación de mercadorías da Sionlla, acompañado de ter máis dispoñibilidade de solo industrial.
Pola súa parte, Miñones destacou a traxectoria profesional de Belén Hernández, “ideias” para exercer as súas novas responsabilidades, tanto pola súa experiencia en Agader como pola década na Xerencia do Consorcio, que fan que teña “un excelente coñecemento de todo o sector produtivo e empresarial no territorio”. O presidente de Mercasa tamén defendeu o proxecto da plataforma, que desde a entidade que preside queren que se “convirta no centro loxístico de distribución de mercancías de referencia no Noroeste”. Tamén explicou que Santiago é o concello elixido para impulsar o proxecto piloto de distribución de última milla, exemplo para a distribución de mercadorías nos cascos históricos de todo o país.
