A mostra, que inclúe as coleccións gañadoras e unha selección das que se presentaron ao certame, poderá visitarse na sala de exposicións temporais do centro sociocultural fenés até o vindeiro 31 de xaneiro. Horario de visitas: de luns a venres, de 10.00 a 13.00 e de 16.00 a 21.00 horas, e os sábados, de 10.00 a 13.00 horas.
O pontevedrés Vicente Fraga Fernández foi o gañador en 2024 do certame fotográfico que convoca a Deputación da Coruña. Fraga acadou o galardón por unha colección titulada Alén, a mellor, para o xurado, das 55 que se presentaron ao concurso, un dos máis prestixiosos dos que se conceden en todo o estado. O comité avaliador -formado por Pepe Baeza Gallur, Sandra Balsells, Chema Madoz, Carmen Dalmau, Juan María Rodríguez e pola deputada de Cultura Natividad González- concedeu, ademais, unha Mención de Honra á serie Nordés, do ourensán Miguel Muñiz.
De Alén, o xurado valorou “a coherencia na poética da memoria e o deterioro do espazo das persoas arraigadas no seu medio”. Para o comité, Nordés ten o mérito “da captura poética dunha atmósfera e a coherencia dunha visión íntima dun lugar e dunhas xentes, onde as forzas elementais da natureza se transmiten con eficaz sinestesia: un documento vívido que máis que amosar fai sentir”.
O xurado tamén selección, amais das premiadas, catro coleccións que forman parte do catálogo (dispoñible na sala de exposicións) e da mostra itinerante que o certame programa por cada edición en concellos da provincia da Coruña. Son: Fin de la faena, A quién, El terremoto de Turquía, e Usar y tirar, perversa moda rápida.
