No 2024 descendeu lixeiramente o número de carnés de identidade e aumentou o de pasaportes
A Unidade de Estranxeiría e Documentación da Policía Nacional en Carballo, que ten a súa sede na planta baixa da Casa do Concello, leva tramitados máis de 100.000 documentos dende a súa apertura ao público, o 20 de marzo do 2017. A media anual supera os 15.000, unha cifra que volveu acadarse no 2024.
Segundo os datos facilitados polo propio servizo, entre xaneiro e decembro do ano pasado foron tramitados 12.251 DNI e 3.360 pasaportes. O número de carnés de identidade descende lixeiramente con respecto aos dous anos anteriores, pero o de pasaportes continúa á alza, unha tendencia que se mantén desde o remate da pandemia, e que no 2024 acadou o seu número récord.
Aínda que a actividade da oficina se mantén ao longo de todo o ano, xaneiro, outubro, agosto e setembro foron os meses do 2024 con maior cantidade de expedicións.
Máis do 30% das persoas que utilizan o servizo residen no noso concello, e máis do 60% proceden dos municipios da nosa contorna. A de Carballo é a oficina de referencia para toda a Costa da Morte, pero tamén se achegan ata ela veciños e veciñas doutros puntos da provincia e numerosos residentes no estranxeiro, fundamentalmente emigrantes da zona noutros países que aproveitan as súas vacacións en Carballo e na comarca para renovar os seus documentos de identidade.
Se precisas utilizar o servizo lembra que é preciso pedir cita previa: ben presencialmente, ben de maneira telemática dende a páxina web www.citapreviadnie.esou ben chamando ao teléfono 060.
O horario de atención ao público da unidade de Carballo é de 09.00 a 14.15, de luns a venres. Dende o servizo lembran que para a expedición e/ou renovación da documentación é preciso achegar unha fotografía actual, e as persoas que necesiten actualizar o seu enderezo tamén deben presentar un xustificante de empadroamento.
