Esta tarde, ao redor dun centenar de persoas manifestáronse para esixir melloras no colexio Castro Baxoi de Miño relativas á masificación das clases, a deterioración das instalacións ou a falta de profesores. A solución a este último punto foi unha das máis demandadas, pois Miño é o concello da zona que máis crece en poboación aínda que non se ve aumentado o número de profesores no centro.
A Asociación de Pais e Nais de Alumnos do colexio convocara a concentración para as 19:00 horas no paso de peóns da estrada DP- 4803, á altura da saída da autoestrada AP- 9, motivo polo que a estrada permaneceu cortada ao tráfico. O punto de encontro foi o restaurante Carboeira.
