Xustifica a medida no aforro mentres el e o seu grupo repártense unha fortuna todos os meses.
O Grupo Municipal Popular denuncia a supresión do pleno ordinario do mes de abril como unha decisión deliberada para impedir o control democrático e silenciar aos grupos municipais que non forman parte do goberno.
“Especialmente quere escapar ao control do gasto da faraónica obra do multiusos de Bastiagueiro que se converteu nun pozo sen fondo”.
“Obra executada polo seu construtor de “confianza”, López Cao” engadiu Loli Silva, portavoz municipal.
A eliminación dun pleno ordinario non responde a criterios de boa xestión, senón a unha estratexia de bloqueo institucional que limita o debate público e vulnera o dereito da oposición para fiscalizar a acción do executivo local.
O alcalde xustifica esta medida nun suposto aforro de aproximadamente 800 euros mensuais que son o total en dietas que cobran os 8 membros da oposición.
Con todo, este argumento resulta claramente insostible e profundamente contraditorio coa realidade económica do propio goberno municipal.
“Só o alcalde percibe máis de 8.000 euros ao mes procedentes das arcas do Concello complementados
por dietas da Deputación, e mantén unha estrutura de goberno composta por doce concelleiros con dedicación exclusiva e sete asesores, cuxos custos mensuais por cabeza multiplica por tres o gasto conxunto que representa os 8 concelleiros da oposición”, aclarou Silva.
A iso engádese o uso de coche oficial e a percepción de dietas e outros gastos asociados ao cargo, o que evidencia que o pretendido aforro é, en realidade, unha escusa para evitar o control político e reducir a transparencia na xestión municipal.
Esta actuación resulta contraria ao espírito e finalidade da Lei Reguladora das Bases do Réxime Local, que establece a obrigación de garantir o funcionamento periódico dos órganos colexiados e o dereito dos concelleiros para exercer as súas funcións de control e fiscalización.
