O bus de doazón de sangue de ADOS recalará este venres pola tarde en Neda

A Unidade Móbil de Doazón de Sangue visitará Neda o venres 7 de febreiro. Durante toda a tarde, de 15:30 a 21:00 h, permanecerá estacionada diante da Casa da Cultura para recibir á veciñanza que queira colaborar con ese xesto anónimo e altruísta a salvar vidas.
Poden ser doantes as persoas maiores de 18 anos que pesen máis de 50 kg, e teñan boa saúde, e cómpre acudir coa tarxeta de doazón, DNI ou documento similar de identificación. Ademais, é preciso informar ao médico no caso de estar tomando medicación.
Dende o Concello anímase á poboación da localidade a colaborar, contribuíndo así a garantir as reservas de sangue suficientes para poder atender a todas as persoas que o precisen. Lémbrase ademais que dunha única doazón poden chegar a beneficiarse tres persoas diferentes, xa que os distintos compoñentes sanguíneos (plasma, plaquetas e glóbulos vermellos) adoitan utilizarse por separado.
Ante calquera dúbida, a Axencia de Doazón de Órganos e Sangue pon a disposición da cidadanía o número gratuíto 900 100 828.