O Concello de Carballo mantén no 2025 os prezos públicos dos espectáculos que se realizan no Pazo da Cultura

A Xunta de Goberno Local aprobo este luns os prezos públicos dos espectáculos organizados polo Concello de Carballo no Pazo da Cultura ao longo do ano 2024. O prezo xeral queda fixado en 5 euros, que se aplicará cando as actuacións sexan de grupos profesionais e non vaian dirixidas a un colectivo concreto, e sempre que a entidade colaboradora non esixa que a asistencia sexa gratuíta ou teña un prezo de entrada distinto.
Nos espectáculos da Rede Galega de Teatros e Auditorios, tal como establece a Axencia Galega das Industrias Culturais (Agadic), fíxanse uns prezos mínimos en función dos cachés das compañías, coa posibilidade de descontos de ata o 50% para determinados colectivos (menores de 18 e maiores de 60) e de ata o 40% para os abonos a ciclos de actuacións. Deste xeito, os prezos serán os seguintes:
• Caché de 750 a 2.500 euros: 5 € (prezo reducido: 3 €)
• Caché de 2.501 a 5.000 euros: 7 € (prezo reducido: 4 €)
• Caché superior a 5.000 euros: 9 € (prezo reducido: 5 €)
Na primeira sesión do ano, presidida polo concelleiro Xosé Regueira como alcalde en funcións, a Xunta de Goberno Local tamén aprobou, vistos os informes favorables dos técnicos municipais, as solicitudes presentadas polas empresas adxudicativas de ampliación do prazo de execución de dúas obras: a rede de abastecemento de auga potable aos núcleos de Espiño, Ramil, O Piñeiro e Goiáns de Arriba, ata o 17 de marzo, polas dificultades que provocaron as chuvias dos últimos meses para a reposición das vías afectadas, e a reurbanización da rúa Portugal, ata o 28 de febreiro, non só polo tempo senón pola necesidade de adaptar os traballos ao estado dalgunhas infraestruturas soterradas pre-existentes.