O prazo para participar estará aberto ata o 29 de novembro
O Concello de Lousame, en colaboración co CPI Plurilingüe Cernadas de Castro, vai desenvolver a campaña de sensibilización “Quérenme ben”, financiada con cargo ao Pacto de Estado contra a Violencia de Xénero e o Ministerio de Igualdade. Unha iniciativa que foi presentada esta mañá pola concelleira de Igualdade, Silvia Agrafojo.
A concelleira explicou que esta campaña “está dirixida a sensibilizar á poboación en xeral da importancia da prevención da violencia de xénero a través do bo trato e o respecto entre iguais”. Tomando como referencia a tradición de esfollar unha margarida á hora de tomar unha decisión, a campaña pretende poñer de manifesto as diferenzas entre as relacións sans e as relacións tóxicas, etiquetadas cada unha delas co cancello #querenmeben ou #nonmequeren.
Haberá dous xeitos de participar a través das Redes Sociais: compartir nas RRSS a publicación que o Concello de Lousame faga da campaña “Quérenme ben” ou compartir unha frase relacionada coa campaña cos cancelos #querenmeben ou #nonmequeren e etiquetando ao Concello de Lousame en Facebook (concello.delousame), Instagram (@somosLousame) ou X (@SomosLousame). En caso de non dispoñer de Redes Sociais, o Departamento de Igualdade de Lousame dá tamén a opción de enviar a frase por WhatsApp ao 689 126 385, indicando o nome e apelidos de quen a envía ou ao grupo ao que representa.
O concurso está aberto a toda a veciñanza e pódese participar de xeito individual ou grupal (aulas, entidades, asociacións…). O prazo para enviar frases remata o 29 de novembro. Ao finalizar a campaña sortearanse 1 vale por unha cea para dúas persoas para quen participe compartindo a campaña, 1 vale por unha cea para catro persoas para quen participe de xeito individual compartindo a súa frase e 1 vale de material deportivo entre os grupos.
Xardín diante da casa consistorial
Silvia Agrafojo explicou tamén que “o propio luns 25 de novembro organizaremos un acto conmemorativo do Día Internacional da Eliminación da Violencia contra a Muller onde, ademais da lectura do manifesto institucional, contaremos cos nenos e nenas do CPI Cernadas de Castro que converterán a praza Teodomiro Hidalgo nun xardín coas súas margaridas e frases contra a violencia machista”.
Os primeiros en participar na iniciativa foron os integrantes da Mesa Interinstitucional contra a Violencia de Xénero, celebrada o pasado venres. Mensaxes como:
– Quérenme ben… cando me escoita con respecto aínda que non pense o mesmo ca min; cando me sorrín; cando me acompañan e respectan no meu día; se me sinto dona de min mesma e das miñas decisións
– Non me queren ben… cando me xulgan sen saber e non me respectan; os que me xulgan sen escoitarme; cando me cargan coas tarefas da casa sen reparto equitativo.
