O proxecto, que se realiza en colaboración coa Fundación María José Jove e a Fundación Emalcsa, busca mellorar a saúde mental de persoas mozas a través do contacto cos cans acollidos
A alcaldesa da Coruña, Inés Rey, visitou hoxe o Centro Municipal de Animais de Compañía para impulsar unha nova fase do Programa Pares. Este proxecto de intervención social, que se realiza en colaboración coa Fundación María José Jove e a Fundación Emalcsa, pon en contacto a persoas mozas en risco de sufrir problemas de saúde mental ou con dificultades de relación social cos cans acollidos no centro municipal.
Acompañaron á alcaldesa na visita a concelleira de Medio Ambiente, Yoya Neira; Felipa Jove, presidenta da Fundación María José Jove, Manuel Aguilar, director da Fundación Emalcsa, e Bettina Kohlhass, subdirectora da Fundación Emalcsa, ademais de técnicos do propio programa e das instalacións municipais.
O programa naceu como un proxecto piloto no que participaron unha vintena de mozos e mozas de entre 14 e 22 anos. O obxectivo é dobre: por unha banda, mellorar a saúde dos mozos e, por outro, visibilizar a recuperación social dos cans acollidos que habitan na canceira municipal. Dados os bos resultados do programa, ambas as entidades decidiron continualo en colaboración coa Fundación Emalcsa co obxectivo de atender ao longo deste ano 2025 a entre 45 e 50 mozos.
“Pares naceu como un programa piloto innovador na liña do traballo que se desenvolve desde o Concello para mellorar a saúde mental e o benestar emocional da poboación, con especial atención aos colectivos máis vulnerables como son os mozos, as persoas maiores ou as que están en risco de exclusión.”, sinalou Inés Rey. “No caso concreto de Pares, o trato cos cans e o seu coidado xera confianza, empatía e contribúe á mellora da autoestima dos participantes no programa”, engadiu.
Pola súa banda, a presidenta da Fundación María José Jove, Felipa Jove, subliñou que “na Fundación levamos anos traballando en programas de terapia con cans e comprobando que a capacidade que teñen para motivar ás persoas é incrible”. “Non son moitas as administracións que apostan por programas tan innovadores como este, así que agradezo ao Concello a súa valentía para facelo posible”, agregou.
