Na reunión avaliaron posibles vías de colaboración noutros aspectos vinculados ás liñas estratéxicas da Consellería como a prevención e xestión do desperdicio alimentario
conselleira de Medio Ambiente e Cambio Climático, Ángeles Vázquez, animou hoxe a Asociación Española de Normalización e Certificación (Aenor) a participar no futuro mercado voluntario de créditos de carbono de Galicia durante unha reunión que mantivo en Santiago de Compostela con representantes da entidade na Comunidade.
En concreto, o decreto que regula este mercado, que ten como obxectivo compensar emisións de gases de efecto invernadoiro (GEI) mediante a compra de créditos xerados por proxectos que eviten ou capturen CO2, indica que a certificación inicial, así como as verificacións continuadas levaranse a cabo por organismos independentes e acreditados.
Nese senso, a conselleira sinalou que os servizos que presta Aenor, así como a súa experiencia, cunha traxectoria de 30 anos apoiando ao tecido institucional e empresarial da Comunidade, serían unha gran contribución para o desenvolvemento e execución deste mercado virtual. Cómpre lembrar que este proxecto busca poñer en contacto aos promotores de actividades xeradoras de créditos de carbono cos potenciais interesados en adquirilos voluntariamente e con independencia de que teñan ou non o deber legal de compensar a súas emisións.
Deste xeito, Galicia será pioneira en España xa que contará co primeiro mercado voluntario de carbono destas características que, mediante a incorporación das novas tecnoloxías e de elementos innovadores, permita a empresas, entidades, organizacións e mesmo cidadáns realizar operacións de comercialización e velar polo seu seguimento posterior.
A maiores, durante o encontro co director da Rexión Atlántica de Aenor, Gonzalo San Antonio, e co director da sede da entidade en Galicia, José Enrique Rodríguez, avaliaron posibles vías de colaboración noutros aspectos vinculados ás liñas estratéxicas da Consellería de Medio Ambiente e Cambio Climático.
Así, entre a solucións técnicas e de certificación que ofrece Aenor, a conselleira amosou especial interese polas accións formativas que desenvolve no marco do Sistema comunitario de xestión e auditoría ambiental (EMAS), que é a ferramenta desenvolvida pola Unión Europea para recoñecer a aquelas organizacións que implantaron un sistema de xestión medioambiental e que adquiriron un compromiso de mellora continua, verificado mediante auditorías independentes.
Na reunión tamén avaliaron a posible colaboración de Aenor para avanzar no obxectivo de reducir o desperdicio alimentario. Cómpre lembrar que neste eido a Xunta está a preparar un plan para impulsar medidas orientadas á promoción de boas prácticas e á prevención de xeración destes residuos.
