Este investimento enmárcase no acordo marco de obras de conservación de firmes na rede viaria da Deputación que ascende a máis de 4,4 millóns de euros para o conxunto da provincia
“Seguimos sumando recursos para a mellora das estradas provinciais, vías fundamentais na vertebración do noso territorio, para garantir que os 1.700 km destas infraestruturas estean en condicións axeitadas de seguridade e avanzar, así, na mellora da calidade de vida da nosa veciñanza”, subliñou o presidente
A Deputación de Pontevedra investirá 724.400 euros en doce estradas provinciais que atravesan A Cañiza, Covelo, Mondariz, As Neves, Ponteareas e Salvaterra de Miño. Este investimento enmárcase no acordo marco de conservación de firmes na rede viaria da Deputación cuxos seis lotes acaban de ser adxudicados e ascenden a máis de 4,4 millóns de euros. “Seguimos sumando recursos para a mellora das estradas provinciais, vías fundamentais na vertebración do noso territorio, para garantir que os 1.700 km destas infraestruturas estean en condicións axeitadas de seguridade e avanzar, así, na mellora da calidade de vida da nosa veciñanza”, asegurou o presidente provincial Luis López.
En concreto, nas comarcas do Condado e da Paradanta as actuacións abranguen traballos nas estradas EP-4005 Areas-Alxén-Cabreira, EP-4006 Ponteareas-As Neves, EP-4101 Meder-Taboexa, EP-4202 Tortoreos-Rubiós-Carrasqueira, EP-4301 Riofrío-Borbén, EP-4303 Mondariz-Meirol, EP-5001 A Franqueira-Cebreiro, EP-5002 A Cañiza-Mourentán, EP-5101 Covelo-A Lamosa, EP-5102 A Lamosa-A Franqueira-As Achas, EP-5103 Prado-Moncelos e EP-5105 Maceira-A Graña, onde se desenvolverán dous tipos de actuacións: por unha banda, nalgunhas estradas levaranse a cabo traballos de fresado do firme para despois repor a capa de rodadura e, noutras, executarase unha capa de microaglomerado en frío.
As obras a realizar nestas estradas provinciais abranguen tamén escavacións, levantado de firme e/ou beirarrúas, saneos, fresados, recrecidos de pozos de rexistro, e, entre outras moitas actuacións, instalación de tubos. Ademais, en todas as actuacións nas que sexa necesario, procederase á reposición da sinalización horizontal.
