A peza teatral, para público familiar, poderá verse ás 19:00 horas no Auditorio Municipal dentro da IV Gala Homenaxe ás Mulleres de Ribadumia organizada para conmemorar o Día Internacional da Muller
+Escénicas trátase dun circuíto de teatro e danza promovido pola Deputación para os concellos de menos de 20.000 habitantes, que na súa segunda edición contará con 195.000 euros
A Deputación de Pontevedra leva este sábado 8 de marzo o teatro ao concello de Ribadumia cunha actividade enmarcada no circuíto +Escénicas, co que a institución provincial apoia a programación de espectáculos de teatro e danza nos concellos de menos de 20.000 habitantes da provincia, e cuxa segunda edición acaba de ser convocada cun orzamento de 195.000 euros fronte aos 150.000 euros da primeira. Esta función correspóndese á programación do primeiro circuíto, que completará a súa andaina este mes de marzo tras percorrer 49 concellos.
En Ribadumia conmemorarán o 8 de marzo, Día Internacional da Muller, coa posta en escena o sábado 8 do espectáculo “4.0.”, de Sue Moreno, ás 19:00 horas no Auditorio Municipal dentro da IV Gala Homenaxe ás Mulleres de Ribadumia “Ribadumia coopera en Feminino”. “4.0” é un espectáculo no que a actriz, trapecista e bailarina Sue Moreno mestura técnicas aéreas circenses con cancións e teatro físico, cunha estrutura de 6 metros de altura e tomando o humor como partitura. A historia presenta a unha muller no seu día a día, tratando de conciliar o seu traballo, vida e maternidade e mostrando as mil caras desta etapa desde unha mirada divertida, tenra e, ás veces, absurda.
Co circuíto +Escénicas, a Deputación busca dar resposta á demanda que o sector profesional vén facendo desde fai máis de 15 anos. A cada concello corresponderalle no segundo ciclo do circuíto unha achega máxima de 3.800 euros para financiar ata cinco espectáculos, incluídos nun amplo catálogo de danza e teatro posto á súa disposición (e dispoñible no sitio web da Deputación de Pontevedra).
