Trátase da cuarta das xornadas da segunda edición desta iniciativa destinada ao movemento veciñal que xa pasou por Fornelos de Montes, Redondela e Salceda de Caselas e chegará este sábado á área recreativa das Ermidas a partir das 16:30 horas
Ademais de Fornelos de Montes, Redondela, Salceda de Caselas e A Lama, +Convivir chegará este ano a Baiona, Rodeiro, Gondomar, Pontevedra, Ribadumia, Bueu, Oia, Barro e Tui
A Deputación de Pontevedra leva este sábado 28 de xuño ata A Lama unha nova xornada do programa de convivencias veciñais +Convivir. Trátase da cuarta actividade desta segunda edición desta iniciativa destinada ao movemento veciñal que xa pasou este ano por Fornelos de Montes, Redondela e Salceda de Caselas, e chegará esta semana á área recreativa das Ermidas a partir das 16:30 horas, coa presenza do deputado de Acción Comunitaria Javier Tourís.
A xornada na área recreativa das Ermidas prevé sumar a centos de persoas que gozarán dunha xornada lúdica pero tamén de aprendizaxes. Neste eido, haberá sesións formativas relacionadas coa musicoterapia, pero tamén obradoiros relacionados cos primeiros auxilios e unha sesión de zumba. Ademais, a actividade completarase coa música dun DJ e cun refrixerio para as persoas asistentes.
+Convivir é un programa provincial co que a Deputación de Pontevedra demostra o seu compromiso co tecido asociativo veciñal e enxalza o papel que este desenvolve para o avance da provincia. Ademais de Fornelos de Montes, Redondela, Salceda de Caselas e agora A Lama, o programa chegará este ano a Baiona, Rodeiro, Gondomar, Pontevedra, Ribadumia, Bueu, Oia, Barro e Tui. O pasado ano, foron case 4.000 as persoas que desfrutaron das sete citas organizadas pola institución ao longo da xeografía provincial.
