O martes 12 de agosto realizarase unha acción telemática arredor do márketing por correo electrónico e o uso da ferramenta Benchmark Email
A Deputación de Pontevedra organiza a próxima semana un novo obradoiro de capacitación tecnolóxica ao abeiro da Rede SmartPeme+. A acción, en formato telemático e con inscrición previa, celebrarase o martes 12 de agosto e afondará en cuestións de grande interese para o tecido empresarial da provincia como son as estratexias de márketing por correo electrónico e a súa aplicación mediante a ferramenta Benchmark Email.
O martes 12 de agosto terá lugar o obradoiro en liña “Optimiza a túa estratexia de marketing por correo electrónico con Benchmark Email”, a partir das 11:00 horas organizado pola oficina de Cambados. O obxectivo da sesión é que os participantes aprendan a transmitir a súa mensaxe, produto ou servizo a través do correo electrónico para mellorar as relacións cos seus clientes na contorna dixital. Ademais, ensinaranse as vantaxes de empregar unha ferramenta específica, como Benchmark Email, para optimizar os seus deseños e medir os resultados das diferentes campañas. O obradoiro será impartido por Jose Luis Taboada, asesor na propia oficina con máis de 25 anos no sector e especializado en sistemas informáticos, e as inscricións pódense realizar neste formulario.
A Deputación destina este ano 1,45 millóns de euros á Rede SmartPeme+ e Acelera Pyme Rural para asesorar persoas emprendedoras desde as oficinas de Barro, Cambados, Lalín, Ponteareas, Pontevedra, O Porriño e Vigo. Desde esta rede lévanse a cabo actividades formativas relacionadas co crecemento empresarial e a transformación dixital, asesorando a ata 2500 emprendedores, autónomos e pemes ao ano e impartindo arredor de 200 talleres formativos e actividades complementarias.
