O presidente provincial visitou as instalacións da asociación e agradeceu o labor indispensable que realiza en Ourense para que as persoas con discapacidade “estean perfectamente acollidas e atendidas, tratadas e con moitísimo cariño e profesionalidade”
A presidenta de aixiña, Olga Cuña, cualificou a visita como moi importante “por facer visible o noso traballo e vernos no noso día a día”
O presidente da Deputación de Ourense, Luis Menor, garantiu hoxe a “máxima implicación” da institución provincial coa asociación Aixiña polo labor indispensable que realiza no mundo dos servizos sociais e da discapacidade, traballo “que vai ligado á historia de Ourense” remarcou.
Luis Menor pronunciou estas palabras durante a visita que realizou ao Centro Intergal de Servizos de Aixiña, situado na Finca Sevilla, onde foi recibido pola presidenta da asociación, Olga Cuña, quen cualificou a visita como moi importante “por facer visible o noso traballo e vernos no noso día a día”.
No percorrido polas instalacións, que contan cunha superficie de 7.200 metros cadrados, tamén estiveron presentes o xerente de Aixiña, Xan Xardón, e a directora da área social, Carmen Fernández. Por parte da Deputación tamén estaban a deputada provincial de Políticas Sociais, Patricia Torres, e o director da área de Benestar, José Juan Cerdeira.
Luis Menor subliñou que Aixiña dá continuidade a un soño iniciado fai 50 anos e que en 1989 iniciou unha nova etapa coa construción do actual centro, que hoxe da emprego social a 126 persoas e atende a máis de 400. Pronunciou en varias ocasións a palabra “grazas” por estar ao carón das persoas que máis o necesitan. Un labor indispensable hoxe en Ourense para que as persoas con discapacidade “estean perfectamente acollidas e atendidas, tratadas e con moitísimo cariño e profesionalidade”.
Tamén tivo palabras de recordo para Recaredo Paz, impulsor deste centro como persoa “adiantada o seu tempo, cunha visión tremendamente ampla” e que foi quen de prender unha semente que os actuais xestores “non só mantiveron, senón que seguen a mellorar día a día”.
Ao longo de mais dunha hora, o presidente provincial coñeceu en detalle os servizos que acolle o centro, como a área de entidades sociais, de actividades terapéuticas e rehabilitación; os centros de día de maiores e de discapacidades físicas; e a zona de residencia na que viven 22 persoas, así como os talleres onde se realizan traballos que encargan, como colaboración con Aixiña, empresas representativas da provincia.
