A Sala de Cultura acollerá a representación, que se enmarca no ciclo provincial “Tornar ás Táboas”, ás 18:30 horas
A Sala de Cultura de Pontecesures será escenario este próximo sábado 28 de outubro da función “Abracadaver”, un espectáculo de Dani Blanco que chega no marco do ciclo “Tornar ás táboas”, co que a Deputación de Pontevedra está a espallar o teatro por toda a provincia neste último trimestre do ano. A representación dará comezo ás 18:30 horas e a entrada será libre ata completar aforo.
“Abracadaver” é un espectáculo de circo “terrorificamente divertido” dirixido ao público infantil e familiar. A través de Rogelio, un personaxe de ficción ao que dá vida o actor Dani Blanco, a proposta está chea de sustos e humor, e caben clown, malabares, escapismo, música… Todo á disposición dun actor preparado para levar a cabo o seu Abracadaver.
Co ciclo teatral “Tornar ás Táboas” a Deputación de Pontevedra vai achegar entre este mes de outubro e decembro un total de 49 funcións gratuítas e dirixidas a todos os públicos a outros tantos concellos da provincia de menos de 20.000 habitantes, coa participación de trinta compañías galegas que ofrecerán unha ampla variedade de espectáculos.