“Hoxe é un día de ledicia para Pontevedra, para o deporte na cidade, para o Concello e para a Deputación porque por fin é unha realidade este campo e por fin saldamos unha débeda histórica cos veciños e veciñas de Salcedo e do conxunto da cidade de Pontevedra”, remarcou o vicepresidente provincial
“Esta obra, financiada ao 100% pola Deputación de Pontevedra, é un símbolo de como a lealdade e colaboración institucional revirte na cidadanía e na mellora da súa calidade de vida”, subliñou Domínguez
O esperado campo de fútbol de Salcedo é xa unha realidade. O vicepresidente da Deputación de Pontevedra, Rafa Domínguez, acaba de participar no acto de entrega deste novo campo de fútbol que, con 1,9 millóns de euros, foi financiado integramente polo organismo provincial. “Hoxe é un día de ledicia para Pontevedra, para o deporte na cidade, para o Concello e para a Deputación porque por fin é unha realidade, por fin saldamos unha débeda histórica cos veciños e veciñas de Salcedo e do conxunto da cidade de Pontevedra”, remarcou o vicepresidente provincial quen recordou que esta “é unha das infraestruturas máis demandas e esperadas pola cidade”.
“Esta actuación, financiada ao 100% pola Deputación de Pontevedra, é un símbolo de como a lealdade e a colaboración institucional revirte na cidadanía e na mellora da súa calidade de vida”, subliñou Domínguez. Neste eido, o vicepresidente provincial manifestou a vontade de “seguir colaborando, porque a cidadanía agradece o traballo conxunto dos organismos públicos para poñer en marcha proxectos como este, que melloran os equipamentos deportivos da nosa cidade”.
En liñas xerais, as instalacións de Salcedo, totalmente novas, contan cun campo de herba artificial e edificacións para vestiarios, aseos, cantina, bancada, enfermería e almacéns, así como unha edificación complementaria para almacén de bicicletas e aula de natureza. A contorna está urbanizada e conta con zonas cubertas para protexer o acceso á bancada e xerar zonas de sombra e resgardo. As instalacións son funcionais e de deseño contemporáneo e están integradas, á súa vez, na contorna natural na que se atopan.
O novo espazo deportivo inclúe catro vestiarios para os equipos, dous para árbitros, caixa de primeiros auxilios, almacén, cantina, espazo para limpeza, aseos de público e sala de instalacións dispostas en tres edificacións que envolven o campo: unha situada no linde oeste da parcela e outras dúas no sur. No lado norte atópanse dúas edificacións, nunha estará a cantina e os aseos do público e na outra o almacén para bicicletas e a aula da natureza.
