O vicepresidente da Deputación de Pontevedra, Rafa Domínguez, participou este martes na Casa do Concello de Pontevedra na presentación dos actos cos que a SD Teucro celebrará o próximo 14 de agosto o seu 80 aniversario. “Encontros 80 aniversario. Parte de ti. Parte de nós” consistirá nunha charla-coloquio con figuras senlleiras do balonmán nacional e un torneo no Pavillón Municipal que medirá o Teucro coa Selección Galega All Stars de Primeira Nacional, e tamén enfrontará o BM Granollers contra o Sport Lisboa e Benfica.
Rafa Domínguez sinalou que “como institución que representa a toda a provincia de Pontevedra sentimos que o Teucro forma parte de nós, ao igual que a Deputación forma parte del a través da longa e estreita colaboración que mantemos ao longo dos anos”. O vicepresidente, que lembrou que o deporte é a máxima aposta do goberno provincial, puxo en valor o “agasallo que lle facedes á cidade e ao conxunto da provincia por este aniversario”, e sinalou que o club leva “80 anos sendo o fogar da ilusión dunha cidade, facendo historia e converténdose en lenda, como a do heroe arqueiro que fundou a cidade e cuxo nome levades”.
