Adopta esta decisión logo de que os grupos políticos non se pronunciaran sobre a ORA e o COB
“Non os chamarei máis xa que o que fan é marear a perdiz, non din nada e bloquean os asuntos”, asegura Pérez Jácome
O alcalde de Ourense, Gonzalo Pérez Jácome, non volverá convocar a oposición a ningunha xunta de portavoces no que resta de mandato. O rexedor adoptou esta decisión logo de que, na xuntanza mantida esta mañá, os grupos municipais de BNG, PSdeG_PSOE e BNG non se pronunciaran sobre as propostas que lles trasladara a semana pasada de eliminar a ORA e valorar a posible entrada de novos accionistas no Club Ourense Baloncesto.
O alcalde considera que os grupos políticos “o que fixeron foi marear a perdiz, non pronunciarse en ningún sentido apelando a que necesitan máis informes, facer reunións entre partes, agardar a que se celebre o xuízo pola demanda do Grupo Hereda (accionista do COB), que se formulen alternativas á ORA,… Mareaban a perdiz con escusas interminables”, concluíu Pérez Jácome, quen advirte tamén que estas argumentacións “non teñen sentido xa que se as propostas van a pleno, terán que posicionarse e votar a favor ou en contra”.
Subliña no caso do equipo de baloncesto que os grupos demandaban datos dos accionistas que estarían interesados: “é algo absurdo porque o que temos que decidir é se estamos dispostos a vender as accións do Concello e ofrecelas no mercado para dar entrada a novos accionistas”. Un asunto que ademias, afirma, “non admite moita dilación porque hai que planificar a próxima temporada”.
Neste senso, explica o rexedor, a falta de pronunciamento político dos grupos municipais deixa “bloqueados” os dous asuntos: tanto a supresión da ORA como a posible entrada de novos accionistas no COB.
Ante este escenario, o alcalde comunicoulles os portavoces que ”esta é a última vez que os convoco. No que resta de mandato, nunca máis os chamarei porque o que fan é marear a perdiz, non din nada e bloquean os asuntos”.
