Trátanse da Cooperativa Agrícola de Forcarei, Aprodeza, Campodeza, Cooperativa Gandeira de Botos, Gandeiros do Deza, Valle del Deza, Xuncoga, Cobideza e O Rodo que recibirán recursos da liña de axudas provincial ás cooperativas agrogandeiras
“O sector primario –asegurou o presidente da Deputación Luis López- é un sector económico fundamental para a nosa provincia, motor de emprego e dinamismo, fundamentalmente en zonas de reto demográfico e do interior da provincia”
A Deputación de Pontevedra destina neste 2025 preto de 262.000 euros a nove cooperativas de Forcarei, Lalín e Rodeiro. Así o confirmou o presidente provincial Luis López, trala aprobación na Xunta de Goberno do reparto das axudas provinciais ás cooperativas agrogandeiras da provincia que, este ano, ascenden a 350.000 euros, 100.000 euros máis que o pasado ano. “O sector primario –asegurou o presidente- é un sector económico fundamental para a nosa provincia, motor de emprego e de dinamismo, fundamentalmente en zonas de reto demográfico e do interior da provincia”.
Na zona do Deza e Terra de Montes benefícianse desta liña de recursos provinciais a Cooperativa Agrícola de Forcarei, Aprodeza Sociedad Cooperativa Galega, Campodeza Sociedad Cooperativa Limitada, Cooperativa Gandeira de Botos, Sociedad Cooperativa Gandeiros do Deza, Valle del Deza, Xuncoga, Cobideza e a Cooperativa O Rodo que con 262.000 euros poderán facer fronte á adquisición de equipos e sistemas informáticos, maquinaria agrícola e equipamento, así como unha parcela, material de vixilancia, automóbil e para a realización de obras en naves. En total, no conxunto da provincia esta liña de axudas chegará a 12 cooperativas que recibirán entre os preto de 6.000 euros de contía mínima e os máis de 45.000 euros de contía máxima.
López subliñou a estreita relación que ten o sector primario con outros sectores económicos de importancia na provincia como é o turismo, “ao proporcionar produtos de quilómetro cero a unha gastronomía, como a nosa, que nos identifica e posiciona no mundo”. Por estes motivos, o presidente amosou a vontade de “estar ao carón do sector agrogandeiro, con liñas de axudas como esta, que avanzan na modernización do seu tecido produtivo para que poidan gañar en competitividade e ir, como esta provincia, sempre a máis”.
