O BNG de Sanxenxo teme que o incremento de prezos, que afecta tanto á veciñanza como a persoas empadroadas noutros concellos, reduza o número de usuarios e usuarias
Fran Leiro acusa a Telmo Martín de tratar de debilitar o servizo e non optimizalo, o que podería dar pé a unha redución de persoal
O Bloque Nacionalista Galego (BNG) de Sanxenxo advirte de que o encarecemento de prezos da piscina municipal pon en risco “a sustentabilidade e o futuro” desta prestación. Así de contundente se amosa o voceiro do grupo da oposición, Fran Leiro, que recorda que todas e todos os usuarios terán que facer fronte a incrementos como o de cota de inscrición, que pasa de 10 a 15 euros, e que este aumento o notarán especialmente as persoas doutros concellos á hora de contratar bonos de 15 pases. Estes pasarán dos 33 euros actuais a mais de 45. “Son prezos que levaban sen actualizarse desde hai máis dun lustro e que, probablemente, terían sido moito máis asumibles de telos feito de xeito paulatino”, lamenta Leiro.
O Bloque ten claro que Telmo Martín non ten coma obxectivo optimizar este servizo, senón máis ben “o acabará por debilitar”, o que podería dar pé a reducción persoal. Neste sentido, Fran Leiro, que recentemente mantivo unha reunión con varios traballadores e traballadadoras das instalacións, alerta de que a día de hoxe aproximadamente o 40% das usuarias e usuarios do ximnasio e da piscina de Baltar son veciños e veciñas doutros concellos. “Non hai un plan establecido, o Goberno do Partido Popular aplica unha suba
elevada dos prezos e dá por feito que non se rexistrarán baixas. E iso é moito supoñer, porque haberá que ver canta xente pode facer fronte a unha suba que non só afecta aos bonos, senón tamén ás inscricións dos cursos”, engade Leiro. En caso de que se produza un descenso de inscricións, “o desfase entre o gastos e os ingresos podería ser aínda maior”, sinalou o voceiro do BNG.
Desde o Bloque tamén se acusa a Telmo Martín de non amosar un interese real á hora de optimizar e mellorar o servizo. “A día de hoxe súbense os prezos para facer uso dunhas instalacións que están mal illadas, teñen vías de auga e que carecen de luminaria LED, utilizándose aínda os alóxenos”, denuncia Fran Leiro. Neste sentido, o voceiro nacionalista insta ao Goberno do Partido Popular a que aclare as razóns polas que o Concello non está a xestionar axudas económicas, a través de Fondos Europeos, para a mellora da eficiencia enerxética da piscina. “Existen varios programas dos que estas instalacións deportivas se poderían beneficiar, pero o único que fixo Telmo Martín nos últimos anos na piscina foron uns traballos de chapa e pintura en plena pandemia, sen ter en conta as necesidades que lle trasladaron os e as traballadoras”, afirmou.
En definitiva, o BNG ten claro que o acontecido co encarecemento da piscina municipal “é só un paso máis na política de cemento e ladrillo do señor Martín, que só sabe gobernar a base de subir impostos e facendo mella nos aforros da veciñanza. Esa é a única solución capaz de prantexar ante as sentenzas urbanísticas desfavorables e o incremento do seu soldo”.
