A Concellaría de servizos urbanos básicos retira o entarimado de madeira que resultaba perigoso e o substitúe por xabre compactado para poder abrilo ao público.
A Concellaría de servizos urbanos básicos, que xestiona Xaquín Moreda, realiza nestes días traballos de arranxo do miradoiro situado sobre o río Lérez na avenida de Bos Aires, á altura do antigo edificio de Maxisterio.
Neste punto existía unha tarima de madeira pilotada sobre un dos noiros do río que estaba moi frecuentemente pechada ao uso peonil porque resultaba esvaradiza e perigosa xa que era unha zona sombría. Nos últimos tempos, o Concello detectou que, ademais, os piares que sostiñan parte do voadizo do miradoiro estaban deteriorados e tiñan que ser retirados.
Para abrir este espazo verde, o departamento de Servizos urbanos básicos optou por retirar todo o entarimado que estaba apodrecido e soportado sobre piares de madeira tamén perigosos, e acorda adecentar a zona coa colocación de xabre compactado e abrir o espazo ao río con varandas metálicas que permitan observar a lámina de auga.
Se o tempo acompaña, as obras poderían rematar na vindeira semana.
