Os xogos estrela da competición foron: a brisca, na que se anotou o 37,41% dos inscritos e a brisca, que agrupou ao 30,21%
A xogadora máis veterana – Mucha, de 93 anos— acadou, con Lolita de parella, o 1º premio do campionato de brisca para Mourente-Cons
A final de chinchón puxo esta mañá o ramo ao I Campionato de Cartas “Cidade de Pontevedra” que se desenvolveu durante a fin de semana no Pazo da Cultura. Onte foi a quenda das finais dos xogos por parella: brisca, tute e escoba.
A concelleira de Benestar Social, Anabel Gulías, entregou hoxe os premios aos gañadores do chinchón (individual): o 1º premio foi para o representante da parroquia de Tomeza, Jesús, e o 2º quedou nas mans de Fina, xogadora de Cerponzóns.
A competición promovida pola Concellería de Benestar Social, e a cargo de Risotadas-Risoterapia, convocou na súa primeira edición a 139 xogadoras e xogadores, dunha ducia de parroquias e barrios da capital do Lérez: Bora, Santa María de Xeve, Santo André de Xeve, Centro Sur, Mourente-Cons, Monte Porreiro, A Parda, Tomeza, Salcedo, Cerponzóns e Canicouva. Dos participantes: 79 foron mulleres (o 56,8%) e 60 homes (43,1).
Foron os xogos por parellas os que acadaron maior participación coa brisca e o tute á cabeza do ránking. O 37,41% dos inscritos competiron na brisca, 52 en termos absolutos: 37 mulleres e 15 homes-; e ata un 30,21% elixiu o tute: 42 persoas, 21 mulleres e outros tantos varóns.
A xogadora máis veterana foi Mucha, unha veciña de Mourente-Cons, de 93 anos, quen recolleu, coa súa parella, Lolita, o primeiro premio de brisca.
Anabel Gulías tomou a remuda da concelleira de Medio Rural, María Xosé Abilleira, que foi a encargada onte da entrega dos premios de tute, brisca e escoba (parellas) que foron para:
Tute. 1º premio para a parella de Canicouva ( Luís e José Benito). 2º premio, para a de Santo André de Xeve (Manuel e José)
Brisca. 1º premio para a parella de Mourente-Cons (Mucha e Lolita) e 2º premio para outra parella da mesma parroquia (Fina e Marga).
Escoba. 1º premio para a parella de Salcedo (Marina e Lidia) e 2º premio para a de Bora (Laura e Marcos).
O Campionato de Cartas “Cidade de Pontevedra” forma parte do programa de actividades a prol do envellecemento activo e a dinamización social das parroquias e barrios que impulsa a Concellería de Benestar Social e nace con vontade de continuidade. Nas distintas eliminatorias, os participantes tiveron que pór enriba da mesa destrezas como a atención, memoria, estratexia, interpretación da linguaxe non verbal, astucia, etc..
