A praia de Santa Marta loce desde hoxe venres, e por segundo ano consecutivo, o prestixioso recoñecemento ‘Bandeira Carreiro Azul 2026’ que lle outorgou a Asociación de Educación Ambiental e do Consumidor (ADEAC) ao Carreiro Litoral de Baiona polos esforzos dedicados á recuperación, mantemento e posta en valor do carreiro por parte do Concello de Baiona.
O alcalde da localidade, Jesús Vázquez Almuiña, xunto a varios edís da corporación municipal izaron esta bandeira medioambiental na citada praia.
O galardón ‘Bandeira Carreiro Azul’ destaca o compromiso de municipios e administracións públicas na recuperación e posta en valor dos carreiros e camiños que promoven a educación ambiental e o desfrute sostible da contorna.
O rexedor sinala que “O Carreiro Litoral de Baiona é un espazo moi valioso para a interpretación e a educación ambiental e para o desfrute da natureza por parte de veciños e visitantes grazas ás accións desenvolvidas polo Concello. Esta bandeira é o recoñecemento do alto valor medioambiental desta paraxe”.
Así mesmo, o primeiro edil destaca que “Os usuarios do carreiro litoral poden realizar actividades recreativas, deportivas e turísticas sostibles e podemos ver que a diario son moitísimas as persoas que desfrutan neste enclave do contacto co medio ambiente para camiñar ou facer deporte en calquera época do ano. O itinerario do Carreiro Litoral permite desfrutar da diversidade de paisaxes, a riqueza natural e as zonas recreativas que o conforman”.
Para lograr o galardón Carreiro Azul hai que cumprir varios criterios e indicadores que se agrupan en catro categorías: características das sendas e trazados; información, señalética e infraestruturas nos carreiros; conservación e xestión do patrimonio natural e cultural; e uso público dos carreiros.
O Carreiro Litoral de Baiona ten aproximadamente 6000 metros de lonxitude cunha baixa dificultade e discorre desde a entrada en Baiona por Ramallosa ata o Parador de Baiona e percorrendo o Paseo Monte Boi. Destaca a flora e fauna existentes no traxecto, así como os servizos ao longo do percorrido, establecementos de hostalería, miradoiros ou áreas de descanso accesibles para persoas con dificultades de mobilidade. O tramo, que tamén inclúe carreiros como o Monte Boi, pasa por todos os areais do municipio e polos portos deportivos e conecta co carreiro fluvial de Baíña.
