Trátase dunha iniciativa privada da sociedade Velasal 22 que dotará ao municipio de dúas salas de velacións
A alcaldesa, Loli Castiñeira, asegura que o servizo é moi demandado pola veciñanza do termo municipal e felicita á empresa
A alcaldesa de Salceda, Loli Castiñeira, visitou as obras do primeiro velatorio da localidade, que constrúe en Parderrubias a empresa Velasal 22, unha vez que acadou todos os permisos necesarios.
A iniciativa desta empresa privada dotará á localidade de dúas salas de velacións e todos os servizos necesarios para a velación e o enterro. Ata o de agora as familias de Salceda víanse obrigadas a desprazarse a Salvaterra, Tui, Porriño ou Ponteareas ante a falta dunha instalación deste tipo no municipio. A alcaldesa asegurou durante a visita ao solar onde comezaron as obras, que o servizo de velatorio é moi demandado pola veciñanza do termo municipal e facíase necesario. “Debo felicitar a esta empresa pola súa iniciativa de poñer ao dispor das veciñas e veciños un servizo que demandan dende hai tempo, ofrecendo unhas instalacións amplas, cómodas e innovadoras”, engade.
O proxecto parte de José Antonio Lemos Martínez e Maximino Ledo Pérez, que constituíron a sociedade Velasal 22 no ano 2022. A edificación, de planta baixa, ofrecerá diversas instalacións destinadas a brindar un servizo integral á poboación local de Salceda e comarca. Contará con dúas salas de velacións amplas, un hall común, unha oficina, dous baños, un almacén, un garaxe e unha zona exterior con xardín na que se habilitarán 60 prazas de aparcamento.
Os promotores consideran que o servizo está deseñado para proporcionar un espazo adecuado e cómodo para a poboación de Salceda e os seus arredores, facilitando a realización de cerimonias e reunións familiares en momentos tan delicados.
A empresa considerou adecuado para construír este velatorio a parroquia de Parderrubias, máis concretamente o barrio de Maceira, pola súa localización céntrica, dotando ao edificio de características innovadoras dende o inicio. O proxecto contou desde o primeiro momento coa colaboración do goberno municipal. Ademais, e segundo os promotores, o velatorio non terá exclusividade con ningunha aseguradora ou funeraria posibilitando que calquera familia de Salceda que desexe que os seus familiares sexan velados dentro do termo municipal, poida facelo.
