O concelleiro Xaquín Moreda visitou esta mañá os traballos de restauración para comprobar que as dúas sendas das ribeiras do Lérez xa están operativas dende este mes de xullo.
Cun investimento de máis de 32.000 euros, as actuacións, respectuosas co medio ambiente, garanten a accesibilidade e seguridade do espazo para o desfrute da cidadanía despois dos danos causados polas enchentes da primavera.
O Concello de Pontevedra vén de finalizar os traballos de acondicionamento e recuperación da senda dos pescadores que une a praia fluvial de Couso e a Illa do Covo, no río Lérez. O concelleiro de Servizos Urbanos Básicos, Xaquín Moreda, supervisou esta mañá o resultado final das obras en compañía dos técnicos municipais.
O proxecto, cun orzamento total de 32.115,69 euros, foi executado tras o período de chuvias da primavera, que provocaran danos significativos na zona. Os traballos, que remataron a finais do mes de xullo, centráronse na recuperación do espazo mediante intervencións non agresivas co medio e aproveitando os recursos naturais da contorna.
As principais actuacións levadas a cabo foron as seguintes:
- Recuperación do areal de Couso: demoleuse e levantouse a parte dos camiños máis próximos á canle do río, liberando a praia e devolvéndolle o seu espazo natural. Para garantir unha accesibilidade mínima, acondicionouse o camiño máis elevado e afastado da auga.
- Reparación de infraestruturas: arranxouse a pasarela de madeira que fóra desprazada polas enchentes. Para previr futuros danos, construíuse un paso inundable que permitirá desviar a auga en épocas de crecida, protexendo tanto o camiño como a pasarela.
- Mellora da seguridade: acondicionouse unha escaleira que se atopaba en mal estado, instalando novos chanzos e unha nova varanda.
- Entre a ponte verde e a Illa do Covo: a senda que estaba moi deteriorada polo que se construíu, un paso para a auga e unha pequena pasarela para salvar un desnivel, garantindo un tránsito seguro.
O concelleiro Xaquín Moreda destacou que “o obxectivo era devolverlle este espazo de gran valor natural á cidadanía nas mellores condicións posibles, garantindo a seguridade e respectando ao máximo a contorna”.
Tamén recalcou que “ademais de ser un espazo de esparexemento da cidadanía tamén se emprega como acubillo climático nestes días de canícula, como a senda fluvial da outra marxe do Lérez xa en condicións dende primeiros da primavera”.
