O Concello de Covelo presenta a primeira edición de Pensando no Verán, unha iniciativa cultural que aposta por recuperar o pensamento crítico e a reflexión pausada nun tempo marcado pola vertixe e a superficialidade. A proposta, financiada pola Deputación de Pontevedra, celebrarase entre os días 12 e 23 de agosto na Reitoral de Santa Marina e contará cun ciclo de relatorios que xirarán arredor dun tema central: a invisibilización da memoria da escravitude en Galicia e en España.
A actividade nace co obxectivo de romper co silencio histórico e cultural sobre o papel do Estado español na trata e explotación escravista, así como co legado de privilexios que aínda perduran nas elites herdeiras daquel sistema. Ao longo de cinco sesións, figuras recoñecidas do pensamento galego abordarán cuestións clave desde a historia, a filosofía, a linguaxe, a arte ou a perspectiva de xénero.
Programa de sesións
- Martes 12 de agosto
Piratas e negreiros na Galicia dos séculos XVIII e XIX
Xosé María Lema Suárez (Catedrático de Xeografía e Historia / Doutor en Historia da Arte) - Xoves 14 de agosto
A invisibilización da memoria da escravitude
Ángel Pérez Fernández e Miguel Vázquez Freire (Grupo Enxergo / Nexos de Didáctica da Filosofía) - Martes 19 de agosto
Mulleres e escravitudes: vellas e novas formas de inxustiza
Iolanda Martínez Suárez (Profesora de Filosofía Moral e Política, USC / Grupo de Investigación sobre Xustiza e Igualdade) - Xoves 21 de agosto
Linguaxe e escravitude: palabras que encadean
Saleta de Salvador Agra (Doutora en Filosofía / Profesora da Universidade Complutense de Madrid) - Venres 23 de agosto
Algunhas teses centrais sobre a escravitude en España e a súa presenza na pintura e na literatura
Jorge Álvarez Yágüez (Doutor en Filosofía / Catedrático de Filosofía de Ensino Secundario)
Todas as sesións terán lugar ás 19:30 h na Reitoral de Santa Marina. A entrada será de balde e libre até completar aforo.
Máis información: Concellería de Cultura do Concello de Covelo telf. 986 650 027
Organiza: Concello de Covelo
Financia: Deputación de Pontevedra
