• A obra do cuntiense José Fuentes Alende consta de dous volumes e foi presentada na Biblioteca Municipal Roberto Blanco Torres
• O alcalde, Manuel Campos, salienta o gran traballo realizado por quen fora o secretario técnico do Museo de Pontevedra
Cuntis, 29 de xuño de 2024.- A Biblioteca Municipal Roberto Blanco Torres acolleu na tardiña deste venres o acto de presentación do libro ‘Los exvotos en Galicia: su significación en la religiosidad popular’, obra do cuntiense José Fuentes Alende, ex secretario técnico do Museo de Pontevedra. A publicación consta de dous volumes, nos que recolle un labor de investigación que comezou no ano 1987 sobre este tipo de ofrendas, tan típicas e arraigadas dentro da tradición galega.
A cita contou cunha gran asistencia de pública. No acto participou o alcalde, Manuel Campos, que lembrou que o traballo de Fuentes Alende gañou no ano 2017 o premio de investigación Olimpio Arca. O rexedor fixo fincapé na calidade e a dedicación deste traballo, no que se analizan os exvotos, as ofrendas que tradicionalmente se realizan aos santos, a modo de obsequio a modo de gratitude ou de devoción. “Estamos a falar dun labor impecable, rigoroso e moi profesional, dunha persoa que para nós é un auténtico referente como é José Fuentes”, sinalou.
Ademais, o alcalde tamén asistiu este venres á audición que ofreceron os alumnos e alumnas da Escola de Música Municipal de Cuntis no Centro Patelas. Unha cita na que a rapazada tivo a oportunidade de amosar os coñecementos adquiridos nas clases impartidas ao longod destes meses, ben sexa a través de bailes ou tocando algún instrumento.
