Dende Alternativa por Mondariz, actual grupo de goberno, consideramos imprescindible que
todos os veciños e veciñas coñezan o punto de partida e actual situación económica da nosa
vila, logo de catro anos baixo a xestión do BNG.
Tal e como recoñeceu o propio BNG no Pleno Municipal do pasado 21 de marzo, a situación
que herdamos “é complexa”. Con todo, isto queda lonxe de reflectir a gravidade real do asunto
e das prexudiciais consecuencias que a veciñanza deberá asumir debido a unha cuestionable
“política de riscos”.
A realidade é que o Concello de Mondariz presentaba, a día 20 de marzo de 2024, un débito
total de 1.421.645,49€. Deste total exclúense 334.426,43 € de gastos de inversión por
corresponderen a un proxecto subvencionado, o que supón unha débeda efectiva de
1.087.219,06 € relativa ós seguintes conceptos:
- Gastos de inversión non correspondentes a subvencións a asumir con fondos propios
do Concello: 104.336,68 €. - Gastos correntes ou de mantemento: 982.882,38 €, contía xerada maioritariamente
en 2023 de aumento inevitable no presente ano por falta de recursos económicos.
Nos últimos catro anos víronse incrementados os gastos xerados polo Concello sen control,
pasando de facer recoñecementos extraxudiciais por importes de 400 mil euros a chegar ata
os 800 mil no último ano 2023.
E iso malia ter sido empregado o remanente de tesourería para o pagamento de gasto
corrente por parte do BNG durante os catro anos da súa lexislatura, nun contexto de
suspensión das regras fiscais a raíz da pandemia. Pola contra, na actualidade, cunha débeda
de más dun millón de euros á que facer fronte, xa non se dispón desta medida extraordinaria
e, aínda así, non podería empregarse debido ó valor negativo do saldo de tesourería xerado
en 2023 (-493.462,33 €). Con todo, aínda que se puidese empregar o remanente de
tesourería para facer fronte á débeda do 2023, non serviría nin para pagar o 50% da mesma.
Este feito denota unha inexistente intención durante os últimos catro anos de conter a débeda
pública e supón o pago simultáneo aos provedores que xa prestaron servizos ao Concello no
2023 á vez que ós provedores que xa están prestando servizos no 2024. Resulta evidente o
gran esforzo de contención de gasto público que debe asumir actualmente o equipo de
goberno, consecuencia de catro anos de descontrol económico.
Para afrontar estes datos, o Equipo de Goberno de AxM xestiona no primeiro Recoñecemento
Extraxudicial de Créditos do 2024 unha serie de facturas seleccionadas en réxime sistémico
atendendo ós seguintes criterios: - Orde de antigüidade das facturas anteriores a 2023.
- Facturas procedentes de autónomos ou pequenas empresas.
- Facturas vinculadas a sectores estratéxicos para evitar o corte de subministración.
Este trámite significa o pagamento dun total de 310.826,03 €, logrando así a redución da
débeda efectiva nun 29% neste primeiro trimestre do ano.
Esta non foi a única medida potenciada polo equipo de AxM, que traballa dende o pasado
ano na elaboración dun orzamento que se axuste o máis posible á realidade dos ingresos e
gastos do Concello. Á súa vez, como parte da busca doutras formas de financiamento,
consultouselle á Deputación de Pontevedra a posibilidade de aprobar unha liña de anticipos
coa que paliar os gastos correntes, medida que, finalmente, non foi adoptada por esta
administración. Ademais, mantense un contacto continuo cos provedores co fin de acordar
formas de pago asumibles, dado que son varios os servizos básicos en cese de pagamento
dende o ano 2023, entre eles: tratamento de residuos e analíticas de auga dende abril,
subministro eléctrico dende xuño e liña telefónica e conexión a Internet dende maio,
supoñendo este último unha incidencia crítica por provocar o corte de servizo ó Concello a
día 25 de setembro de 2023.
O BNG, lonxe de asumir a súa responsabilidade, opta por atacar a AxM alegando unha
presunta falta de xestión. Contrariamente, cómpre lembrar que é o actual equipo de goberno
quen tramita as secuelas da xa mencionada “política de riscos”, co obxectivo de mitigar as
repercusións e impacto que esta provocou na vila. Mostra disto, alén do xa citado, son os
esforzos de AxM por buscar fontes de financiamiento para proxectos, mesmo para aqueles
xa realizados pero contratados fóra do marco das subvencións. Isto supuxo asumilos como
un custe máis para o Concello, malia que xa se sabía que non había recursos suficientes para
pagar ós provedores. Unha deficiencia na xestión semellante é a relacionada co trámite da
subvención para a redacción do proxecto da área recreativa do Val, axuda non concedida por
ausen cia de contrato escrito.
Estas circunstancias supoñen unha proxección estancada en detrimento da evolución e do
futuro de Mondariz que pouco preocupa ó PP, centrado exclusivamente na liquidación da
débeda a empresas vinculadas cos concelleiros do seu grupo político. Así mesmo, cuestionan
que a selección de facturas do presente REC sexa motivada por exercer prexuízo na súa
contra. Esta visión deturpada e desconsiderada vén provocada por un conflito de intereses
afastado da realidade colectiva, sendo precisamente este o problema que intenta evitar a lei
ao prever como incompatible a condición de contratista coa de concelleiro da Corporación
municipal.
En conclusión, Mondariz ve hipotecado o seu futuro, obrigando e restrinxindo a labor política
municipal á redución prioritaria da débeda pública, no canto de potenciar o progreso da vila.
Con todo, AxM loitará por superar esta situación e acadar así o benestar común dos veciños
e veciñas.
