Filgueira lembra que en novembro de 2021 o Pleno da corporación aprobou unha iniciativa do BNG neste sentido
Recoñecer as vítimas do fascismo e honrar a súa memoria, eis os eixos fundamentais dunha nova iniciativa do BNG para que o concello de Cerdedo-Cotobade deixe de ser incumprir a Lei e, sobre todo, para que honre, como se merece, a memoria das persoas demócratas asasinadas polas forzas franquistas no noso termo municipal.
Non é aprimeira vez que o BNG leva este tema a pleno. Así, en xaneiro de 2020, instaba ao goberno municipal a cumprir coa Lei e eliminar toda a simboloxía de exaltación da ditadura no noso termo municipal, en especial naqueles espazos públicos, como fontes, edificios, etc. Daquela o PP votou en contra da iniciativa escudándose nunha suposta “falta de recursos” para levar a cabo esa actuación. En novembro do ano seguinte o BNG volve enviar ao pleno unha moción en termos semellantes que foi aprobada coa abstención do PP.
Nesta moción aprobada instábase á creación dunha comisión de seguimento para a eliminación de toda a simboloxía franquista. Non obstante, máis de tres anos despois, non se fixo nada.
“Lamentamos que por pasiva o sr. Cubela siga as directrices da rúa Génova e manteña unha actitude de desprezo as vítimas do fascismo, e de conivencia cos verdugos”, afirmou o portavoz do BNG, Ernesto Filgueira.
O Portavoz municipal do BNG citou ao historiador local, Manuel Reboredo, e a Xosé Álvarez, un dos maiores especialistas na represión na comarca, para solicitar a necesidade de restaurar a memoria dos asasinados na Volta do Couto, en Calvelo o 8 de novembro de 1936: José López Bernárdez, Luis Frade Pazos, Ramiro Granja González, Luis Varela Sobrado, José Montoto Rodríguez, Eliseo Garra Lalín, Alfonso Alonso Portugue (sic), Telmo Rodríguez Alonso, Juan Alonso Pérez, José Gómez Sampayo e Antonio Picallo Buela. Para eles pedíu o recoñecemento da corporación e a colocación dunha placa conmemorativa que honre a súa memoria no lugar onde foron vilmente asasinados.
O BNG volverá a levar o tema ao vindeiro pleno coa esperanza que o PP deixe a súa actitude vergoñenta e aposte dunha vez por todas pola xustiza, a dignidade, a reparación e a democrácia.
