•O Concello cumpre con todas as esixencias económicas: estabilidade, regra de gasto e nivel de débeda, deixando un remanente positivo que non pode investirse pola falta de apoio da oposición
O Concello de Pazos de Borbén vén de pechar o exercicio económico 2024 cun resultado positivo en todas
as áreas claves de xestión financeira: cun superávit de máis de 190.000 euros (190.513,59 €), un aforro neto superior aos 263.000 € e un nivel de endebedamento de só o 3,85 %, moi por debaixo dos límites legais establecidos.
Estes datos, recollidos no informe de intervención oficial, amosan que o goberno municipal liderado por Luciano Otero, en situación de minoría, foi quen de manter as contas públicas equilibradas, xestionando con responsabilidade e rigor os recursos da veciñanza.
Porén, e a pesar do remanente positivo acumulado nos últimos anos, o alcalde mostra o seu malestar ante a imposibilidade de investir ese diñeiro en melloras e necesidades urxentes para o municipio, pola falta de apoio dunha oposición que, lonxe de colaborar, bloquea proxectos e acordos fundamentais para o desenvolvemento de Pazos de Borbén.
“Non se entende que, tendo un Concello saneado e con recursos dispoñibles, teñamos que ver como eses cartos quedan sen gastar por culpa dunha oposición máis centrada en afogar economicamente ao goberno que en mellorar a vida da veciñanza”, lamenta Otero.
Desde o equipo de goberno insístese en que os cartos públicos deben servir para transformar o municipio e dar resposta ás necesidades reais das persoas, e non para acumularse en contas mentres hai proxectos bloqueados. Esta realidade evidencia unha situación paradoxal: un goberno solvente e responsable, maniatado pola falta dunha maioría que impide avanzar ao ritmo que Pazos de Borbén merece.
