• Contará coa asistencia da secretaria xeral do PPdeG, Paula Prado, e do presidente provincial, Luis López.
O Partido Popular de Moraña presentará este sábado a candidatura coa que concorren ás eleccións municipais do 28 de maio nun xantar no que Sito Gómez estará arroupado por máis de 300 persoas. Celebrarase na Carballeira de Santa Xusta a partir das 13.30 horas, e contará coa asistencia da secretaria xeral do PPdeG, Paula Prado; do presidente provincial, Luis López; da secretaria xeral e número 2 da candidatura, Luisa Piñeiro; e do alcalde, José Cela.
O candidato agradece o apoio de todos os veciños, no que será o seu primeiro gran acto político. “A menos de unha semana para que comece de xeito oficial a campaña das eleccións máis importantes para os concellos, é fundamental contar con toda a forza e o respaldo dos veciños de Moraña. Representamos á inmensa maioría social dos veciños, e seguimos preparados para continuar gobernando con estabilidade e rigor”.
Sito Gómez destaca que “presentamos unha gran candidatura, con persoas implicadas de principio a fin en traballar polo interese xeral, comprometidas para deixarse a pel por este concello”. Di que o reto que teñen por diante é grande, e que o asumen con total responsabilidade e ilusión: “É importante manter un goberno solvente, de confianza e comprometido, que nos permita seguir avanzando, tal e como se fixo na última década, e que continúe coa transformación global emprendida polos alcaldes Luisa Piñeiro e José Cela tanto no eido da dinamización socioeconómica como na consecución de infraestruturas e equipamentos e a implantación de servizos públicos”.