A alcaldesa, María Ramallo, recupera a tradición de despedir no Concello á promoción de alumnos e alumnas que rematan os seus estudos no centro castrense.
A Armada contará a partir deste Día do Carme con 123 novos oficiais, 123 alumnos e alumnas que pasaron estes anos en Marín e que agora xa teñen os seus primeiros destinos asignados.
A alcaldesa, María Ramallo, quixo recuperar con eles unha tradición que nos últimos tempos quedara paralizada desde a pandemia, que é a de despedir ao alumnado antes da súa graduación, tal e como se fai ao inicio da súa singladura académica.
Ademais, a esta xeración, que arrancou o seu camiño no 2019, “pasouvos e todo”, porque a pandemia supuxo cambios e novidades na súa formación, “pero agora poderedes ter un Día do Carme moi especial, moi importante e con toda a Escola engalanada para vós”.
A rexedora quixo trasladarlle “a miña máis sinceira noraboa polo voso traballo e adicación estes anos, pero sobre todo moita sorte e ánimos para os retos que tendes por diante, xa que a vosa vocación de servizo público supón grandes sacrificios, sobre todo a nivel persoal”.
Durante o acto, que se levou a cabo no Salón de Plenos do Concello, tamén interviron dous alumnos, Pablo Álvarez Gutiérrez e Francisco Manuel “Quico” García Torres, os dous de Marín, que aseguraron ambos que esta vila “quedará grabada na memoria dos que non son de aquí, pero xa se sinten como si o foran,durante toda a súa vida, de xeito moito máis forte do que quedarán outros destinos nos que estaremos de paso”.
Ramallo e o batallón de alumnos remataron o acto coa tradicional fotografía na escalinata do Concello e coa entrega por parte da rexedora dunha fotografía impresa da súa benvida, cando empezaron os seus estudos na vila.
